തൊഴിൽ നിയമങ്ങൾ, തൊഴിലവകാശങ്ങൾ, തൊഴിൽ പ്രശ്നങ്ങൾ എന്നിവ സംബന്ധിച്ച മികച്ച ധാരണ നൽകുന്നതിനും അവ കൈകാര്യം ചെയ്യുന്നിതിനുള്ള വിവിധ മാർഗങ്ങൾ കണ്ടെത്തുന്നതിനുമായി വിഭിന്നങ്ങളായ പരിശീലന പരിപാടികൾ, ശിൽപ്പശാലകൾ, സെമിനാറുകൾ എന്നിവയിലൂടെ തൊഴിൽ മേഖലയെ ശാക്തീകരിക്കാൻ കിലെ പ്രതിജ്ഞാബദ്ധമാണ്. വിവിധ ഗവേഷണങ്ങളിൽ നിന്ന് ശേഖരിച്ച ഡാറ്റകൾ വ്യത്യസ്ത ടാർഗെറ്റ് ഗ്രൂപ്പുകളുടെ അടിസ്ഥാന ആവശ്യങ്ങളെക്കുറിച്ചറിയാൻ സഹായിക്കുന്നു, ഇത് പരിശീലനത്തിനായി പുതിയ മൊഡ്യൂളുകൾ സൃഷ്ടിക്കുന്നതിനും നിലവിലുള്ളവയെ പുന:രുജ്ജീവിപ്പിക്കുന്നതിനും ഉപയോഗിക്കും. ഓരോ വിഭാഗത്തിന്റേയും ആവശ്യം വിശകലനം ചെയ്യാൻ സഹായിക്കുന്നു. മാത്രമല്ല പങ്കെടുക്കുന്നവരിൽ നിന്നുള്ള നിരന്തരമായ പ്രതികരണം (ഫീഡ്ബാക്ക്) ഓരോ മൊഡ്യൂളും പുന:രവലോകനം ചെയ്യുന്നതിൽ നിർണായക പങ്ക് വഹിക്കുന്നു.
സംസ്ഥാനത്ത് അനുയോജ്യമായ വ്യാവസായിക അന്തരീക്ഷം സൃഷ്ടിക്കുക എന്നതാണ് കിലെയുടെ വിദ്യാഭ്യാസ, പരിശീലന പരിപാടികളുടെ ലക്ഷ്യം. തൊഴിലാളികളുടെ നൈപുണ്യവും അറിവും മെച്ചപ്പെടുത്തുക, ഉദ്പാദനക്ഷമതയും കാര്യക്ഷമതയും വർധിപ്പിക്കുക, വിവിധ കക്ഷികൾ തമ്മിലുള്ള സഹകരണം പ്രോത്സാഹിപ്പിക്കുക എന്നിവയാണ് പരിശീലന പരിപാടികളുടെ ലക്ഷ്യം. കൂടാതെ, സാങ്കേതിക വിദ്യയിലും, വ്യവസായത്തിലെ പുത്തൻ പ്രവണതകളിലും തൊഴിലാളികൾക്ക് പുതിയ കഴിവുകളും കരിയർ അവസരങ്ങളും വികസിപ്പിക്കുന്നതിനും പരിശീലനം സഹായിക്കുന്നു. നൈപുണ്യ വികസനം, വിജ്ഞാന വികസനം, മനോഭാവമാറ്റം എന്നിവയ്ക്ക്പരിശീലന പരിപാടികൾ ഒരുപോലെ ഊന്നൽ നൽകുന്നു.
ഓഡിയോ – വിഷ്വൽ അവതരണം, പ്രഭാഷണങ്ങൾ, ഗ്രൂപ്പ് ചർച്ചകൾ, കേസ് സ്റ്റഡീസ്, ബിഹേവിയറൽ സയൻസ് ടെക്നിക്കുകൾ എന്നിവ ഉൾപ്പെടുത്തിയിട്ടുള്ളതാണ് കിലെയുടെ പരിശീലന പരിപാടികൾ. പരിശീലന പരിപാടികൾ ശക്തിപ്പെടുത്തുന്നതിന് വിദഗ്ധരായ ഗസ്റ്റ് ഫാക്കൽറ്റികൾ ഉൾപ്പെടെ വിവിധ വിഷയങ്ങൾ കൈകാര്യം ചെയ്യുന്നതിന് ഞങ്ങൾക്ക് പ്രശസ്തരായ ഫാക്കൽറ്റികളുടെ ഒരു പൂൾ ഉണ്ട്.
കിലെ ഇൻസ്റ്റിറ്റ്യൂട്ട് താഴെപ്പറയുന്ന വിഭാഗങ്ങൾക്ക് വിദ്യാഭ്യാസവും പരിശീലനവും വാഗ്ദാനം ചെയ്യുന്നു:
- ട്രേഡ് യൂണിയൻ നേതാക്കളും സംഘടിത, അസംഘടിത മേഖലയിലെ തൊഴിലാളികളും
- സംസ്ഥാന സർക്കാരുകളിലേയും മറ്റ് മേഖലകളിലേയും ലേബർ അഡ്മിനിസ്ട്രേറ്റർമാരും ഉദ്യോസ്ഥരും
- പൊതു-സ്വകാര്യമേഖല വ്യവസായ സ്ഥാപനങ്ങളുടെ മാനേജർമാരും ഓഫീസർമാരും
- ഗവേഷകർ, പരിശീലകർ, ഫീൽഡ് വർക്കർമാർ, തൊഴിൽ പ്രശ്നങ്ങളുമായി ബന്ധപ്പെട്ട മറ്റുള്ളവർ